Багьудлумачил бегIбиахъес
Нушани гьалабра буриливан, «Гьидаят» Центрлизиб хьунул адамтас динна багьудлуми дедлугути сари. Илаб белчIуди очный ва заочный тяхIярли бетурхуси саби.
БелчIудила дурарадра илар хьунул адамтас хасдарибти жура-журала далдуцунира детурхули дирар. Илдачибра хьунул адамти гIягIниси тяхIярла, шаригIят хIясибли динна кьанунтачил тянишбирути саби. Ил тяхIярли, ишди бурхIназиб хьунул адамти вебкIибсила жаназа бекIбирнила тяхIяр-кьяйдаличил тянишбариб. Иличила тIинтIти баянти дуриб ва гьар секIал чедаахъиб Сакинат МяхIяммадовани. Ил балбуц ва лекцияби хIябал бархIи даимдиуб. Ахирличир цалабикибтала суалтас жавабти дедиб.
Гьарил мицIирси адам мурт-биалра убкIуси сай ва ил гIягIниси тяхIярли ахиратла хъули гьунивватес чебси саби. Хаслира ил бегI гьалаб хъарси саби сунела гъамтачи. Ил багьандан балути адамтази хьарбиули, илдигъунти багьудлумачил бегIбирес гьарилтачи чебси саби.
