ЖамигIятлис пайдалатили бетарар
Гьалабван шайх МяхIяммадариф-Апандила уличилси Дагъистанна Исламский университетла бучIантани белчIудила дус хъараахъур. Ил балбуцличи цалабикилри Дагъистанна муфтий, шайх ГIяхIмад-Апанди, илала кумекчиби ва заместительти, Дальний Востокла муфтий Рабазан-Хазрат ГIялиев, Дагъистанна ва унра регионтала динна гIялимти ва гIяхIли.
Ишдусла выпускникуни мубаракбарес 2000 - ибил дусличибад бехIбихьили, илаб бучIули калунти лебил выпускникунира бакIиб. Цалабикибтала гьалав гъайулхъули ва бучIанти мубаракбирули Дагъистанна муфтий, шайх ГIяхIмад-Апандини буриб: «Мубаракдирулрая хIуша, ахIерти выпускникуни, ишбархIила пергер бархIиличил. ХIушани нушала Идбагла ﷺ дурхъаси хазнали сарти, нушала ЧевяхIсила белхъхIебелхъуси динна кьанунти лутIи-хьулчилизирадал дяркъниличил. Вирхес дигулра, хIушани илди багьудлуми лайикьси тяхIярли пайдаладирниличи ва вирхулра хIуша халкьлис манпагIяттили дирниличи. СенкIун нушачи хIербикIули саби гIядатла адамтани бусурман диннис кьимат кабалтуси. Ислам нушани пикрибарибси ахIен, ил ЧевяхIси Аллагьла ﷻ дурхъаси дин саби, Идбаглис ﷺ аманатбарибси. Идбагли ﷺ биалли, ил Абу-Бакарлис аманатбарибси, илкьяйдали саби ил тIинтIбикIуси. Ил дурхъаси динна кьиматбирусира нушачи хIеръили саби, пикридухъеная хIуша сецад халаси жавабкардеш лебал нушачиб. Кьудратла ВегIлизи тиладибирулра нуша адамти цабиънилис сабабли диахъес».
Университетла проректор МяхIяммадрасул Гимбатов сунела дугьабизлизив викIар: «Нушала университетлизир гьарил багьудлумачи вегIиэс вирар, ва илди пайдаладарес дигусилис шуртIри акIахъубли лер. ГIилмула даража ахъбуцес дигутасра имканти лерти сари. Лерилра хIуша мубуракдирулрая чихъти багьудлумачи дегIдиъниличил, илди пайдаладарахъес ЧевяхIсини кумекбараб».
Илис гIергъи гъайухъунси Дагъистанна муфтийла кумекчи МяхIяммадрасул Саадуевли буриб: «ХIушачи нушани халаси игьдибар бирхьулра. Дирхулра, хIушани ЧевяхIсила умуси динна даража ахъбурцниличи».
Илкьяйдали цархIилти илаб гъайбухъунтанира буриливан, университетли бяркъ ва багьудлуми дедили, нушала жамигIятлис пайдалати, нушала МухIяммад Идбагла ﷺ умматлис багалати адамти дурайули саби. Илаб жагьилтани кайсуси саби Идбагли ﷺ нушаб букьурли батурси пергер рухIла давла. Илабси багьудили ишбархIила дунъяла зараллизибад, вайси бяркълизибад чеалкIуси наслу мяхIкамбирули ва уцахъули саби.
Ахирличиб ункъли бучIути студентуни грамотабачил, савгъатуначил ва жузачил шабагъатлабариб. Гьалабван бетерхурси лебил Россияла конкурслизиб бутIакьяндеш дарибти бучIантас хIяжлизи путевкаби дедиб.
