ГIажаибаб дуниял

Араб къоялъул гуреб божи гьечIеб дуниял,
БачIунелъул ургъелаз унти ккараб дуниял,
Хваразда бахиллъараб ракI чIунтараб дуниял,
ГIуразда ракI бухIараб гIажаибаб дуниял.

Эркенлъиялъул пикру гьабулареб дуниял,
ГIарцул гIор чваханиги гIорцIулареб дуниял,
Хвезе рукIин лъаниги хьул халатаб дуниял,
Хабалъ гIалам лъуниги ургъел гьечIеб дуниял.

Жиндий хайир гьечIев чи хвайин толеб дуниял,
ХъамалчагIазда хадур рекерулеб дуниял,
БитIарабин, тIекъабин рищ-магъ гьечIеб дуниял,
РищватчагIи гIемераб гIакса ккараб дуниял.

Берцинаб рагIиялъул къимат гьечIеб дуниял,
Къадру бугел какулеб лъай босараб дуниял,
ЛъикIлъи гьаби лъалареб хIалихьатаб дуниял,
ХIакъаб рагIул щибниги къимат гьечIеб дуниял.

Кодоблъи цIикIкIарасул хьибил кколеб дуниял,
ГIакълу кьолев мискинчи нахъе цулеб дуниял,
Квешлъи гьабулесдаги тIад рекъолеб дуниял,
Гъибат-бугьтан гьоцIогIан гьуинлъараб дуниял.

Аллагь ниж рикIкIад гьаре гьеб квешабщиналдаса,
Какараб гIамалалъул гIасияб напсалдаса.
Аллагь, ниж дуца цIуне, жужахIалъул цIедаса,
ЦIадар ккеялъе ругел квешал гIамалаздаса.

РАИСАТ БАТАГIАЛИЕВА