Инхелоса Устар
Дир росулъа устар, кIудияв гIалим,
Мансурил МухIаммад, къуватав къутIбу.
Дир росу чIухIарав, рекIел хазина,
РекIее дир дару, дур пикру гьаби.
Дур хиял гьабичIеб къо букIунаро,
Духъ керен бухIичIеб сагIатго гьечIо.
Мун цевеса араб лахIзат букIинчIо,
Дур хIисаб гьабичIеб минут дир инчIо.
Мунги ракIалда щун, вокьулев эмен,
Чанги сверана дун, дур минаялда.
Жанив мун гьечIого жиндир нур свараб,
Щвана дун, КIудияв, дур минаялде.
Насаб къурайщияй ХIадижатил вас,
Хивал дур гьабиялъ дун свакаларо.
ЛъикIай эбелалъул баркат щварав вас,
Духъ урхъичIеб заман дир букIунаро.
Муридзаби къачIан ругьунав эмен,
Кин рукIаян тарал дуца дур лъимал.
Лъиего рагьухъе дур кавуги тун,
Щайзе мун къокъарав, жалго нижги тун.
