Къо-мех лъикI, къо-мех лъикI шагьру рамазан
Къо-мех лъикI, къо-мех лъикI шагьру рамазан
Къварилъун пайда щиб, гIодун хайир щиб,
Баркатал гIемераб шагьру рамазан,
БачIараб лъачIого къокъулеб бугин.
Къварилъун пайда щиб, гIодун хайир щиб,
МустахIикъаб дандчIвай кIвечIин гьабизе.
Къуръан жинда жаниб рештIараб щагьру,
Щвалде щвараб хъулухъ лъачIо гьабизе,
Лайлатул къадриги жаниб бахчараб,
Хазина рагьизе ратичIо кIулал.
Алжан ричIаниги, жужахI къаниги,
Жан-къуватго гIечIо гIибадаталъе.
ЩайтIан бухьаниги напсалъ квегъиялъ,
Кодобе босизе гIамалго щвечIо.
КваначIо, гьекъечIо кIал ккун бугилан,
КIалъачIого чIезе гьунарги гIечIо.
ГIадат хIисабалда тарахIги бана,
Таргьиниб ккараб жо гьелъулги ккечIо.
Азарго моцIалъул хиралъи щолел,
Хириял сардалги кьижун риччана.
ШамгIунил гъазават рокъобго щолес,
Ярагъги борчичIо, напсги гъуричIо.
Къварилъун пайда щиб, гIодун хайир щиб,
ГIайиб чIвазе чиги дунго вугелъул,
Къо-мех лъикI, Къо-мех лъикI шагьру рамазан,
Мунго ананиги баркат баркат хутIаги.
Къо-мех лъикI, къо-мех лъикI, хадуб мархIаба,
Хадусеб соналъги хехго бачIайги.
ХадуйсалалъгIаги дуй хъулухъалъе,
Халикъас къуват кьун, тавпикъ гьабеги.
ЗагIипал нижерги анищ букIуна,
Къабулазда гьоркьор малъун телилан.
Тохал ругониги гIибадаталъе,
Къудратав Аллагьас рохизарилин.
