Бокьула мун нижей
Божигун, рохелгун щвараб батаги,
Баркатал чвахулеб тавпикъалъул моцI.
Имангун, Исламгун нуралъул цIураб,
ЦIоб гIатIидаб нижер шагьру-Рамазан.
Къуръанал цIалулеб, таравихI балеб,
СухIуралде рахъун рогьел цIилъулеб.
Мунагьал чурулеб, шайтIан тIурулеб,
Сардилъ тIаде рахъун Аллагь рехсолеб.
ДугIа къабулазул къокъилъ ватулев,
Рамазан моцIалъул хIурмат гьабулев.
ХIалихьат-нафсалде дандеги вагъун,
Ракъи-къечалъ куцан кири босулеб,
Бокьула мун нижей, шагьру-Рамазан.
Ражаб-ШагIбаналда хадуб бачIунеб,
Огь, Рамазаналъул бугеб баракат.
Аллагь разилъулеб гIамал гьабизе,
Рамазан моцIалъул парзал тIуразе,
Лайлатул къадриги кIодо гьабизе,
ГIаламалъул Аллагь, нижей квербакъе.
