РачIа, нилъ ургъизе

РачIа, нилъ ургъизе

Дунялги рихун буго,

Хвезеги бокьун гьечIо,

Гьал гIадамахъ балагьун

Гьалдолеб ракIги буго.

Иманги дагьлъун буго,

Динги загIиплъун буго,

ГIурул ганчIазде сверун

Сверухъ щайтIаби руго.

ГIадамазул куц буго,

Каранлъ ккун иблис буго,

Гьимулеб гьумер буго,

Гьабулеб гъибат буго.

РачIа, вацал, ургъизе

Унеб гьаб гIумруялда

Цоцазде гурхIел-цIобалъ

РахIму бечедги гьабун.

ГIорцIарасда вакъарав

Берда вихьизе виччай,

Мискинасда кверчIвазе

Киназго хIаракат лъе.

Унтарал гIемер руго,

Язихъал дагьал гьечIо,

ГIадамасул гурхIел-цIоб

ЗагIипго, хъашлъун буго.

РагIабазде гIинтIаме,

ГIамал хисизе гьабе,

Рихьдае дин гьабуге

Гьабе ургъел, иман ккун.

Пайда гьечIеб дунялалъ

Гуккулеллъун рукIунге,

Аллагь разияб хIалалъ

ХIалбахъе цере ине.

А. ГIабдусаламов, ТIелекь росу