Баркат гьарзаяб хазина

Баркат гьарзаяб хазина

Гьал къоязда къватIибе бачIана кIудияв гIалим, гIакъил, тIарикъаталъул муршид, халкъияв тохтур, таржамачи Сайфуллагь-къадияс (къ.с.) хъвараб «Мавакъифу ссадат» абураб тIехь. Мубаракас тIехь хъвараб заман кколеб буго гIумруялъул ахирисел лахIзатал.

Гьелда цебе хъван буго «Канзул магIариф» абураб, гIараб мацIалда, 900-ялдаса цIикIкIун гьумер бугеб тIехь. Цин хъвараб гьеб къватIибе бахъизе заман хутIиларин хIинкъун, гьелда хадубго магIарул мацIалда хъван буго «Мавакъифу ссадат» тIехьги. ХIакъикъаталдаги гьеб кколеб буго гIарабалъ хъвараб доб тIехьалъул къокъаб хIасил данде гьабурабгIадаб гIелмияб хIалтIи.

Гьеб тIехьалда Сайфуллагь-къадияс (къ.с.) баян гьабулеб буго тIарикъаталда жанир ругел чара гьечIел рахъал. Хасго баян гьабулеб буго муридасул кинаб хьвада-чIвади букIине кколебали. ТIарикъаталдаса бугеб дунял-ахираталъе пайда, гьелъул адабалгун гьаризе рекъарал тIадкъаязе кьолеб буго баян. Гьеб тIоцебесеб нухалда басмаялда бахъана, ЧIикIаса СагIид-афандиясул амруялда рекъон, «Нурул-иршад» басмаханаялъ. Гьаб кIиабилеб дагьабги гIатIид гьабун, жеги цIикIкIараб хIалтIи тIад гьабун бахъана ГIабдулжалил-афандиясул ишараялдалъун, АхIмад-афандиясул гIахьаллъиялдалъун.

Сайфуллагь-къадияс бергьун кIудияб хIалтIи гьабун буго Дагъистаналда накъшубандиябгун шазалияб тIарикъатал тIиритIизариялъе гIоло. Чорхол сахлъи гьечIолъиялъухъ балагьичIого, жиндирго гIумруялъул ахирисел къоялги гьес тIехь нилъехъе щвезабиялда инабун буго. Гьеб хъваралдаса нусгоялдаса цIикIкIун сон аниги, гьабсагIатги муридзабазе кутакалда хIажатаб тIехь буго гьеб.