РахIматал рещтIунеб бакI

Аллагьасул ﷻ расулас абун буго БетIергьан ﷻ рехсон цониги къавм данделъичIин жидеда сверун малаикзаби лъугьун ва жалги рахIматалъулъ тIерхьун гурониян. Жеги абун буго Аллагь ﷻ рехсезелъун цониги чагIи данделъичIин, гьеб данделъиялдаса жидер мурадги гIицIаб Гьесул ﷻ разилъи щвей гуреб букIинчIел, жидеде «Нуж тIаде рахъа мунагьал чурараллъун, нужер квешал гIамалал лъикIазде сверизарунаян» зобалаздаса ахIулев чияс ахIун гурониян. (АхIмад, Муслим).

Бищун лъикIал ругин жал рихьиялдалъун Аллагь ﷻ ракIалде щолел гIадамалин буго аварагасул ﷺ машгьураб хIадисалда. Аллагь ﷻ рехсей буго шайтIан-иблисалда данде вагъулев муъминчиясул хвалчен. БетIергьан Аллагь ﷻ рехсолеб мажлис алжаналъул ахазул цояб бугин абула, Гьев ﷻ рехсолеб данделъи рахIматалъулъ тIерхьун, малаикзабаз сверун ккун букIуна, гьенир гIахьаллъаразе алжаналъул нигIматал насиблъула, квешлъиялде ккеялдаса цIунаравлъун вукIуна ва жужахIалдасаги цIунула.

Аллагь ﷻ рехсей буго ТIадегIанас ﷻ Къуръаналда нилъедаса тIалаб гьабулеб гIамалги. Суратул «Анфалалъул» 45-абилеб аяталда абулеб буго (магIна): «Нужеца Аллагь ﷻ рехсе гIемер рехсеялъ», - ан. Аллагь ﷻ рехсей нилъеца Гьев рехсеялда къокълъараб гIамалги гуро, гьеб буго БетIергьанасда ﷻ нилъ ракIалдещвей ва Гьесги ﷻ нилъ рехсей. Суратул «Бакъараталда» абулеб буго (магIна): «Нужеца дун рехсе, Дица нужги рехсела», - ян.

Гьедин БетIергьанас ﷻ абуниги гьеб буго нилъеда бичIчIизелъун нилъ Гьесде ﷻ хIажаталлъун рукIин. Аллагь ﷻ рехсеялъул хIакъалъулъ гIалимзабаз абулеб буго: муъминчиясул ракI Аллагь ﷻ рехсеялде хIажалъиялъул мисал буго ччугIил лъеде хIажалъиялда релълъараб. Лъим гьечIого ччугIа холеб кинниги Аллагь ﷻ рехсей теялдалъун ракIги чIунтула. БетIергьан ﷻ рехсолевлъун лагъ вугебгIан заманалъ гьесул рухI сабруялда букIуна, иманги цIикIкIуна, ургъел-къварилъи тIаса аравлъун лъугьуна, дунялалдагун ахираталда талихIалда квершел батаравлъунги лъугьуна.

Абу Гьурайратидасан бицараб, машгьураб хIадисалда буго, аварагас ﷺ абунин: «Аллагьасул ﷻ руго ракьалда хьвадулел хасал малаикзаби жидеца данделъарал гIадамазул цIех-рех гьабулел. Жидеда батараб мехалъ Аллагь ﷻ рехсезе данделъараб къавм, гьез ахIи бала: «Гьанире, нужерго анищ бугелде гIедегIе», - ян. Цинги гьел малаикзаби рачIуна ва жидер кваркьабаздалъун гьел сверун ккун зодоре щвезегIан гьезда тIад горал гьарун чIола.

Хадуб Аллагьас ﷻ цIехолеб буго: «Дир лагъзал щиб гьабулеллъун нужеца тарал?» - абун. Гьел малаикзабаз абула: «Нижеца гьел Дуе рецц, тIадегIанлъи ва тасбихI гьабулеллъун тана», - ян. Аллагьас ﷻ цIехола: «Гьезда Дун вихьанищ?» - абун. Малаикзабаз жаваб гьабула: «ВихьичIо», - ян. Нахъеги цIехола Аллагьас ﷻ: «Кинха букIине букIараб гьезда Дун вихьаравани?» - ян. Гьез абула: «Мун вихьаравани гьел рецц, тIадегIанлъи ва тасбихI гьабиялъулъ жеги цIакъ бахъулеллъун рукIинаан», - ин.

Аллагьас ﷻ нахъеги цIехола гьезда: «Сундаса гьез цIуни гьарулеб бугеб?» - ан. «Гьез абула: «ЦIаялдаса», - ян. Нахъеги Аллагьас ﷻ гьикъула: «Гьезда гьеб бихьанищ?» - абун. «БихьичIо», - ян малаикзабаз абидалги БетIергьанас ﷻ гьикъула: «Бихьарабани, кин гьел рукIине рукIарал?» - ан. Жаваб гьабун малаикзабаз абула: «Бихьарабани, гьелдаса лъутиялъулъ ва рикIкIалъиялъулъ жегиги цIакъ бахъулеллъун рукIинаан», - ин.

Хадубги БетIергьанас ﷻ гьикъула: «Щиб гьез тIалаб гьабулеб бугеб жо?» - ян. Малаикзабаз абула: «Алжан буго», - ян. «Гьезда алжан бихьанищ?» - ан БетIергьанас ﷻ гьикъидалги, малаикзабаз абула: «БихьичIо», - ян. «Гьеб бихьарабани, кинаб хIал гьезул букIине букIараб?» - ан гьикъула Аллагьас ﷻ . Жаваб гьабун малаикзабаз абула: «Алжан бихьарабани, гьел рукIинаан гьеб щвеялъе жеги цIикIкIун цIакъ бахъи гьабулел», - ан.

Гьеб мехалъ ТIадегIанав Аллагьас ﷻ абула: «Дица нужее нугIлъи гьабулеб буго Дица гьезул мунагьал чуранин», - абун. Малаикзабаз абула: «Я нижер БетIергьан ﷻ ! Гьенив вуго цояв, гьел рехсарал ишал жиндир мурадлъун бугев гурев, жиндирго хIажаталъе гIоло вачIарав», - ан. Гьелъие жаваб гьабун Аллагьас ﷻ абула: «Гьеб къавм буго жидеда аскIов гIодов чIарав талихIкъаравлъун лъугьунарев», - ан.

Аллагьас ﷻ нилъ ратаги гIамал гьаби тIубанго Гьев ﷻ разилъуледухъ гьабулеллъун ратичIониги, Жиндирго ﷻ рахIму-цIобалдалъун тIаса лъугьун тарал лагъзадеридаса! Амин!

МУХIАММАД САЛМАНОВ