Заман хехлъи
ГIабдуллагь ибн МасгIудидасан бицана аварагас абунин: «Къиямасеб къо гIагарлъиялъул гIаламатаздасан ккола моцI хехго хиси», - ян. (ТIабарани)
Абу Гьурайратидасан бицараб хIадисалда буго: «Къиямасеб къоялъул гIаламатаздасан ккола моцI хехго хиси, ай моцIалъул тIоцебесеб къоялда абизе буго гьаб моцI кIиабилеб къоялъул буго», - ян (ТIабарани). Гьебго магIнаялъул хIадис буго Анасидасан бицарабги.
Гьел хIадисал ричIчIизе ккани, лъазе ккола гьижрияб календаралда рекъон, щибаб моцIрол авалалда моцI цIакъго тIеренаблъун букIунеблъи. Цинги къоял анагIан, кIиабилеб бащалъи щвезегIан, кIодолъулебги букIуна гьеб. КIиабилеб бащалъиялдаса байбихьун, букIарабго хIалалда гьитIинлъизе байбихьула. Гьел хIадисаз тIоритIел гьабула къиямасеб къо гIагарлъидал моцI цIилъиялъул билълъин хехлъи букIиналда. Гьелъул магIнаги ккола, заман цIакъго хех ине бугин абураб. Къоялъул гьитIинлъиялъ гIадамал зигардулел рихьула щибго гьабизе заманго гIолеб гьечIин абун.
