Инстаграмалъ лъалхъи гьабуна
Нилъеца пикру гьабулищ нилъерго гIамал-хасияталъул? Нилъ сабаблъун кколищ квешаб яги лъикIаб жо тIибитIизабилъе? Нилъеда лъалищ квешаб жо тIибитIизабиялъе нилъ сабаблъун ккани гьелъул мунагь тIибитIанагIан, чи рикIкIун нилъее хъвазе бугеблъи? Масала, хъалияби ва гIаракъи бичулев чи. Гьеб гIаракъи сабаблъун хъизан биххани, чи чIвани, авария ккани яги жеги кIуди-кIудиял питнаби ккани, киналъухъго тукадул бетIергьанасеги букIуна мунагь. ГьитIи-бикъинаб жо гьечIо гьеб, диналъул вацал ва яцал. Гьединал къабихIал пишаби ТIадегIанав Аллагьас ﷻ рес кьун букIаго те, кантIе ва тавбу гьабе.
Гьаниб рехсезе бегьула эбел-инсуца лъималазе кьолеб тарбияги. Гьез лъикIаб тарбия кьуни, лъималаз гьабунщинаб лъикIал гIамалазул гьезиеги кири щола. Квешаб тарбия кьуни, лъималаз гьабунщинаб квешал гIамалазул квешлъи гьезиеги хъвала. Гьелъин нилъеца лъималазе тарбия кьеялде кIвар кьезе кколеб. Щайин абуни, нилъеца жаваб кьезе кколелъул нилъеда Аллагьас ﷻ аманатлъун таразул. Гьединго, чияс кальянал, къасисел клубал, ай жинда жаниб квешлъи тIибитIизабулел жал рагьани, гьединасеги букIуна лъугIулареб квешлъи. ХIисаб гьабе, ТIадегIанав Аллагьасда ﷻ цеве чIараб мехалъ кин нилъеца жаваб кьезе бугеб? ЦIодорлъи ккола, заман тIаде щвезегIанго кантIун, квешаб тун, тавбу гьабун, лъикIал гIамалазде вуссин. Аллагьас ﷻ нилъ гьелде кантIизареги.
Нилъеца пикру гьаби тани, нилъеда кIоларо черхалда тIад хъаравуллъи гьабизе. Гьелъин пикру гьаби Исламалда беццулеб, лъагIалица гIибадат гьабиялдасаги жиб лъикIаблъун рикIкIунеб. Дунял буго хехго унеб жо. ГIадамалги пикру гьабизего регIулел гьечIо. Интернеталдасан квешлъиялде цIикIкIун квербакъулебги буго. Жакъа бачIана замана инстаграмалъеги тиктокалъеги лъалхъи гьабураб. Гьединлъидал, воре, пикру гьаби нужеца тоге.
Гьениб гIадамазул, хасго гIолохъанаб гIелалъул битIахъе бетIер сверулеб букIана. ЯхI-намусалда рекъараб щибго букIинчIо. ЛъикIлъиялдаса квешлъи бергьине биччазе бегьуларо. Аллагьасул ﷺ рахIму, ццималдаса цебе кколеб букIинчIебани, щибдай Аллагьас ﷺ нилъее гьабизе букIараб, нилъер гIамалазухъ? Нилъехъ балагьидал, нилъ мустахIикълъун рихьула дунялалдаса тIагIинаризего. Амма нилъ зигардула кутакалда лъикIал чагIи ругилан.
Абула щибаб жоялъулъ лъикIлъи бугин, жиндаса пайда босулеб. Амма социалиял гьиназда ккараб лъалхъи нилъеца пайда босараб куцалъ букIуна. Цоязда ккела гьеб кIудияб балагьин, цояз гIакъилго пикру гьабун пайда босила, жиндирго гIамалазул хIисаб-суал гьабила. Щайин абуни, нилъеца гьаниб хIисаб гьабуни, доре щвараб мехалъ гьабизе бугеб хIисаб бигьалъизе бугелъулха. Гьелъин ГIумар-асхIабас абураб, нужер хIисаб гьабизегIан, гьанжего хIисаб гьабеян нужерго гIамалазул.
ШАМИЛ МУХIАММАДОВ
