ЦIали ахиралде щвана
Щуго сонил манзилалъул захIматаб нухги нахъа тун, напс квегъун, батIи-батIиял захIмалъабазде сабру гьабун, МахIачхъалаялда ГIайшат АхIматIиловалъул цIаралда бугеб тIабигIат берцин гьабиялъул школалъул щуабилеб курсалъул ясал-мутагIилзабаз цIали ахиралде щвезабуна.
Гьеб рохел сабаблъун, берцинаб мажлисги тIобитIана МахIачхъалаялда. ГIумруялъул нухда чара гьечIого хIажатал насихIатал гьаруна мугIалиматаз мутагIилзабазе ва цIали лъугIаразе сертификаталги кьуна.
Улбуз жидерго разилъи ва баркала загьир гьабуна лъимазе гIелмуги тарбияги кьуразе. МутагIилзаби кIодо гьаризе рачIун рукIана гьалбалги. Гьезги цIакъ рекIелъе рортулел, берцинал рагIаби абуна.
Сон мутагIилзабилъун рукIарал ясал, метер жалго рукIине руго Ислам тIибитIизабиялъул церехъабилъун. Ин шаа Ллагь.
