Аварагасул рагIаби

МухIаммад аварагасул цо-цо хIадисал:

«Нухдаса чороклъи, квешлъи нахъе гьабиги – садакъа ккола» (Бухари).

«Паризаяб какалда хадуб бищун хирияб как буго – сардилъ бараб как» (Муслим).

«Аллагьасда божулей чIужугIаданалъе хIалалаб гьечIо, росасе бокьичIого, рокъоса къватIие яхъине» (ХIаким).

«Нужер цонигияв кьижун ккани, какичури цIигьабе» (Абу Давуд).

«Бусурманчиясул ракI бохизаби Аллагьасе бищун бокьулеб гIамал ккола» (ТIабарани).

«Дунялалъул хиралъи бечелъи буго, ахираталъул хиралъи ТIадегIанав Аллагьасдаса хIинкъи буго» (Ибну Мажагь).

«Гьабураб къотIи тIубазабуларев чиясулъ иман букIунаро» (Бухари).

«Хасият берцинлъи Аллагьасе - бищунго бокьулеб гIамал буго» (ТIабарани).

«Бищун бигьаяб гIибадат – вуцIцIун чIейги хасият берцинлъиги ккола» (Ибну Абу-Дуня).

«Рогьалил как бан хадуб, кьижиялъ рикъзи нахъчIвала» (Ибну ГIади).

«Рогьалил какде мажгиталде арав – иманалъул байрахъ кодоб ккурав чи вуго» (Ибну Мажагь).

«Хьул лъунщинаб тIагIам кванай, исрапчилъи ккола» (Бухари).

«Дуца гьоркьоб-гьоркьоб зиярат гьабе, дуде рокьи цIикIкIина» (Баззар).

«Нужеца гьабуралда релълъараб нужераздего буссуна» (Ибну ГIади).

«Жал гурхIулезда Аллагьги гурхIула» (Тирмизи).