Баркалаялъул калам

Дун ккола 67 сонил ригьалде яхарай Унсоколо росулъа Зубаирова АгIишат. 2023 соналъул 17 январалда егизе ана МахIачхъалаялда бугеб кардиологиялъулаб больницалде. Гьениб дие гьабуна коронораграфия. Гьелъ бихьизабуна дие бугеб гIузруги. Гьениб ичIго къоги бан дун рокъое йитIана, росулъе инчIого, шагьаралда йикIиналъул къотIиялда.

Гьез абун букIана ревматологасухъеги, гемотологасухъеги айиланги. Ревмотологалъ дир анализал ритIана Москваялде. Гьелдаса хадуб рокъоб кIиго моцIгIанасеб заманалъ гьабуна дару, цинги кIиабизеги ритIана анализал Москваялде. Анализазул лъикIаб хIасил букIун батилаха, 22 марталъ дун ахIана операция гьабизе. Амма хIатIал гьорон рукIиналъ дун ячана реанимациялъул отделениялде ва цинги микьабилеб къоялъ ячана операция гьабизе.

Операция гьабулаго дир ракI чIун букIун буго, бидурихьалъул кIалтIа тромбги лъугьун. Гьеб тромб бахъун буго лезги миллаталъул тохтур-реаниматолог Рамазанов Кахриманица. Дун рекIеде ячIун хадуб гьес абуна кинабго ТIадегIанасул иш бугин, тохтурзабиги Аллагьас сабабалъе тIамурал ругин абун.

Аллагьасул гурхIелалдалъун, тохтурзабазул кумекалдалъун дун тIаде яхъана, рецц БетIергьан Аллагьасе, АлхIамдулиллагь.

Гьанже дие бокьун буго, казият гьоркьобккун, баркала загьир гьабизе отделениялъул заведующий Насрулла МухIамадовичасе, тохтур Зумурат МухIамадовналъе, директор МахIачев ГIусмание, бетIерав тохтур Абакаров Абакарие, реанимациялъул отделалъул заведующий Шахнавазов АхIмадхание, тохтур-реаниматолог Мучалова ПатIиматие, рентгенхирург ГIабасов Физулие, рентгенхирург ГIусманов ГIусмание, тохтур-реанимотолог МухIамадова Альбинае, медсестраби - Къадирова Асиятие, ГIабдулгIазизова Муъминатие, ХIажиева Хадижатие, Чаканаева Асиятие.

ДунгIадин Аллагьги разилъаги гьездаса.