Гъизляр

ДРялъул муфтияталъул Гъизляр шагьаралда бугеб лъай кьеялъул отделалъул хIалтIухъан МухIаммад МухIаммадовас гIахьаллъи гьабуна «Нет террору- МЫ ЗА МИР» абураб цIаралда гъоркь шагьаралъул школазда тIоритIарал тадбиразда. Лъималазе вагIзанасихIаталъулаб кIалъай гьабуна М. МухIаммадовас, кашиш С. Лимонтиновас, «Хвел гьечIеб полкалъул» вакил Э. Къадиевас, терроралде данде къеркьолеб комиссиялъул аппараталъул специалист А. Витютневалъ. Культураялъул централъул халкъияб театралъул артистаз бихьизабуна театралияб сценкаги.

ХЬАРГАБИ

Рамазан моцIалъул хIурматалда МахIачхъалаялда тIобитIана Хъвартихьуни росдал гIадамаз гIахьаллъи гьабураб мажлис. Гьелда гIахьаллъи гьабуна Хьарагаби районалъул имамзабазул советалъул председатель Тажудин ГIабдулаевас, муфтияталъул районалда бугеб лъай кьеялъул отделалъул нухмалъулев МухIаммад ГIабдулхIажиевас , Хъвартихьуни росдал имам МухIаммадгIарип МухIаммадовас, районалъул бетIер МухIаммадгIали ТIагьировас, росдал бегавул Асадула Пахрулисламовас, районалъул гIолилазул цевехъан Шамил Кимаровас, машгьурал спортсменаз ва цогидазги.

ГУМБЕТ

Районалъги гIахьаллъи гьабуна нухазда хьвадиялъул хIинкъи гьечIолъи цIуниялъул мурадалда тIобитIараб тадбиралда. Гьениб лъималазе бицана нухазда цIунизе кколел низамазул, бихьизабуна нух бахине кколеб куц ва шагьаразда ругони светафоралъул гIурччинаб канлъи рекIинчIого нухде лъугьине бегьулареблъи. Гьединго водительзабазеги гьаруна насихIатал ва гьезие рикьана нухазда низам цIунизе кколеб куцалъул хъвай-хъвагIай тIад гьабурал брошюраби.

УНСОКОЛО

Унсоколо районалда тIобитIун букIана лъималазда гьоркьоб Къуръан цIалиялъул рахъалъ къецал. Гьезда бергьарал кIодо гьариялъул тадбир тIобитIана Шамилхъалаялъул централияб мажгиталда.

Тадбиралда гIахьаллъи гьабуна районалъул имамзабазул советалъул председатель ХIасан МухIаммадовас, муфтияталъул лъай кьеялъул отделалъул нухмалъулев МухIаммадсултан ГIабдулаевас, Шамилхъала поселокалъул имам Шамил МухIаммадхIажиевас, «Инсан» фондалъул районалда бугеб филиалалъул нухмалъулев МухIаммад МухIаммадовас. Бергьаразе ва гIахьаллъи гьабуразе кьуна батIи-батIиял сайгъатал.

ХУНЗАХЪ

1954 соналда чемпионаллъун рахъун рукIаразул хIурматалда Гъонохъ росулъ тIобитIана волейбол хIаялъул рахъалъ лъабабилеб тур. Гьелдаса хадуб спортзалалда тIобитIана мажлис ва гьелда гIахьаллъи гьабуна районалъул имамзабазул советалъул председатель МухIаммадрасул Гьиматовас, Хунзахъ росдал имам МухIаммад ГIабдулхаликъовас, гIолилазул цевехъан Сайпула Шамхаловас ва цогидазги. Мажлис нухда бачана росдал имам МухIаммад СагIадулаевас.

ЦIУНТIА

Муфтияталъул районалда бугеб лъай кьеялъул отделалъул нухмалъулев ГIабдурахIман МухIаммадов дандчIвана Междуречье росдал школалъул цIалдохъабигун ва цоцазда гьоркьор цIунизе колел хIукъукъазул бицун гьабуна гьезие вагIза-насихIат. Гьединго бицана лъай тIалаб гьабиялъул бугеб кIваралъул, гьитIинас кIудиясул гьабизе кколеб хIурматалъул. Ахиралда гьес жавабал кьуна цIалдохъабазул суалазеги.

ГЪУНИБ

Муфтияталъул районалда бугеб лъай кьеялъул отделалъул нухмалъулев ГIалиасхIаб Разакъов щвана Кудалиб росдал участкалъулаббольницаялде . Гьев дандчIвана коллективгун ва бицана гьабулебщинаб ишалъулъ нилъеца Аллагьасе рецц гьабизе кколеблъиялъул. ГI. Разакъовас абуна аварагасул r хIадисалда бугин бищун лъикIал кколин жидедаса цогидазеги пайда бугел. Гьелда рекъон гьабизе кколин хIалтIиги.

ШАМИЛ

Къелеб мухъалъул росабазда гьоркьоб тIобитIана битIун какие чуриялъул ва как баялъул рахъалъ къец. Гьеб тIобитIана лъабго бутIаялдеги бикьун, ай руччабазда гьоркьоб батIаго ва бихьиназда гьоркьоб батIаго. Гьединго къец тIобитIана школлъималазда гьорокьобги. Къецалъул тIоцебесеб бутIа тIобитIана щибаб росулъ ва финал – Ругъелда. Бергьаразе кьуна къиматал сайгъатал ва шапакъатал.