Финалистка кIодо гьаюна
Унсоколо росулъ тIобитIараб тадбиралда кIодо гьаюна «Основы религии и жизнеописание Пророка Мухаммада » абураб тIехьалда тIасан тIобитIараб конкурсалда финалалде йорчIарай ХIалимат МухIаммадова.
Муфтияталъул хIаракаталдалъун тIобитIараб республикаялъулаб гьеб конкурсалда гIахьаллъи гьабуна микьазаргоялдасаги цIикIкIун чияс. Унсоколоса ХIалимат МухIаммадовалъин абуни гьениб ккуна кIиабилеб бакI.
Рехсараб тадбиралда гIахьаллъи гьабуна муфтияталъул мугIрузулаб округалда вугев вакил МухIаммад Дибирдадаевас ва районалъул имамзабазул советалъул председатель ХIасан МухIаммадовас.
Гьединго гIахьаллъана росдал бегавул ХIабиб ГIабдулаев, муфтияталъул районалда бугеб лъай кьеялъул отделалъул нухмалъулев МухIаммадсултан ГIабдулаев, росдал имам АхIмад ДахIадаев, «АсСалам» казияталъул вакил ГIабдула АхIмадинов ва «Инсан» фондалъул нухмалъулев МухIаммад МухIаммадов.
КIалъазе рахъараз бицана гьединал къецал тIоритIиялъул бугеб кIваралъул ва щивав чи ахIана аварагасул гIумру лъазабиялде кIвар кьезе. Данделъиялъул ахиралда росдал жамагIаталъул рахъалдасан ХIалиматие кьуна къиматал сайгъаталги.
