Дагниялда - цIияб мажгит
Дагниялда - цIияб мажгит
Табасаран районалъул Дагни росулъ тIобитIана гIелмияб мажлис. Гьеб тIобитIиялъе гIиллалъунги ккана гьениб цIияб мажгит рагьи.
Тадбиралда гIахьаллъана ДРялъул муфтияталъул югалъулаб округалда вугев вакил ХIусен ХIажиев, Табасаран районалъул имамзабазул советалъул председатель Ансар Рамазанов, диниял хIаракатчагIи, муниципалитеталъул хIалтIухъаби ва цогидалги.
ХIусен ХIажиевас жамагIаталда баркана цIияб мажгит ва баркала кьуна гьеб баялда гIахьаллъи гьабунщиназе. Хасго баркала кьуна имамзабазул советалъул председателасе гьединаб мажлис гIуцIизе хIаракат бахъаралъухъ ва данделъарал ахIана жамагIат-каказда тIадчIей гьабизе.
Табасаран районалъул администрациялъул бетIерасул тIоцевесев заместитель Рамис ГIусмановас баркала загьир гьабуна республикаялъул мутияталъе халкъалда гьоркьоб гьабулеб бичIчIикьеялъулаб хIалтIухъ ва абуна администрация хIадур букIин хIажатаб бакIалда кумек гьабизе.
Мажлисалда Баркалаялъулаб кагъат кьуна, мажгит баялъе гьабураб кумекалъухъ, АхIмадовазул хъизамалъе.
Гьединго цIияб мажгиталъул имамлъун тасдикъ гьавуна ГIусман ГIабдулаев.
