Муфти дандчIвана СМИялъул вакилзабигун
Муфти дандчIвана СМИялъул вакилзабигун
ДРялъул муфтияталъул конференц-залалде данделъун рукIана СМИялъул вакилзаби. Гьелъие гIиллаги букIана Дагъистаналъул муфтигун дандчIвазе бокьи.
Гьениб «Ас-салам» газеталъул, Ислам.ру, Исламдаг.ру сайталъул редакторзабаз, «ННТ» ва «ВатIан» теле-радиоканалазул нухмалъулез, муфтияталъул пресс-хъулухъалъул хIалтIухъабаз бицана жиде-жидецаго гьабураб ва гьабулеб бугеб хIалтIул хIакъалъулъ.
«Дида гьедун абизе кIола дир нухмалъиялда гъоркь хIалтIулезда гьоркьов гьечIо лъикIав гурони чи. Дида сверухъ квешал чагIи рукIине ресги гьечIо», - ян абуна ДРялъул муфти, шайих АхIмад-афандица.
Гьес бицана гъалатIал кколарев чи вукIунарин ва бищун лъикIаб иш бугин ккараб гъалатI битIизабизе хIаракат бахъи ва гьедин гьабизе рес кьуралъухъ БетIергьанасе шукру гьаби. Гьединлъидалин абуна АхIмад-афандица, щивав чияс хIаракат бахъизе кколила жамгIияталъе пайдаявлъун вукIине ва пайдаял ишал гьаризе.
ДандчIваялъул ахиралда муфтияс СМИязул вакилзаби кIодо гьаруна Баркалаялъул кагъталги къиматал сайгъаталги кьун.
