Наркотиказде данде
ЛъаратIа районалда, диниял хIаракатчагIазул квербакъиялдалъун, тIобитIана школлъималазе наркотиказда данде къеркьеялъул бицунеб дарс.
Гьединаб мурадгун Гъараколоб росдал школалде рачIун рукIана ДРялъул муфтияталъул ЛъаратIа районалда бугеб лъай кьеялъул управлениялъул ва «Инсан» фондалъул вакилзаби. ЦӀалдохъабазухъе щвана районалъул лъай кьеялъул управлениялъул начальник Ибрагьимов АхӀмад, ТӀохьотӀа росдал имам АхӀмад ГӀумаров ва «Инсан» фондалъул вакил Ибрагьимов Рашидбег.
Гьезги кIалъазе рахъарал цогидазги, мисалалги рачун лъималазда бихьизабуна психоактивиял жалаз (ПАС) инсанасул черх хвезабулеб куц. Аслияб мурад букӀана гӀолилазухъе гӀадатияб хӀакъикъат щвезаби: наркотиказ ва гьекъолеб жоялъ жидерго букӀинеселдаса гьел махIрум гьарулеблъи загьир гьаби.
Гьединго, лъималазе бицана исламияб диналда рекъон, гӀакълуялъе ва чорхое зарал гьабулеб бокьараб жо хӀалтӀизаби кӀудияб мунагь букӀиналъул хIакъалъулъги.
