Эбелалъул къо
Эбелалъул къо
«Инсан» фондалъ ЧIарада районалда тIобитIана Эбелалъул къоялда хурхун тадбир. Аслияб куцалда гьеб бухьинабун букIана СВОялда жидер лъимал чIварал, лъимал-инвалидал хьихьун ругел, Россиялъул регионазда дагIват гьабулел лъимал ругел ва 10 яги жеги цIикIкIун лъимал ругел хъизамаздаса улбул кIодо гьариялда.
Муниципалитеталъул бетIер МухIидин МухIаммадовги регионалияб парламенталъул депутат МухIаммад СагIдулаевасул кумекчIужу Муслимат МуртазагIалиеваги щвана СВОялда чIварал рагъухъабазул хъизамазухъе.
Эбелалъул къоги баркун, депутатасул рахъалдаса гIарцулал сайгъатал кьуна гьез Гьачада росулъа Хатимат ГIалибеговалъеги ЦIуриб росулъа Гарага Мусаевалъеги. «Нужееги хъизамазеги сабру кьеги Аллагьас. ВатIаналъе гIоло рухI кьурал нужер васазул бахIарчилъи даим кIоченаро халкъалда. ХIажаталъур хIалае рахъине хIадурал руго нижги», - ян бицана гьез.
