МугIалимзабазул кумек
ГIахьвахъ районалъул ТIадмагъилъ росулъа Пари МухIамадовналъ, риидалил каникулазул заманалда, тIобитIана «Дир бищун лъикIаб гьудул – «Ас-салам» абураб темаялда тIасан тадбир. Гьеб лъугIидал гьелъ лъималазе рикьана газетал ва риидалил заманалъ гьелда тIасан рокъоб гьабизе хIалтIиги кьуна. Гьелъ бицана жиндие цIакъ бокьулин «Ас-салам» ва гьелда рахъулел макъалабаз лъималазулъ бижизабулин диналде рокьиги, малъулин тарбиягиян. Гьединго газеталда батулин бокьараб суалалъе жавабгийилан.
Гьелъул цIалдохъабазеги цIакъ бокьула «Ас-салам» ва цо номер гьоркьоб биччачIого цIализеги цIалула. Гьебги ккола Пари МухIамадовнаялъул хIаракат.
Гьединго баркала кьезе бокьун буго исаламалъул нухда гIемераб хIалтIи гьабулел Лъибищоса МухIаммадова Аминатие, ГIабдусаламова Жавгьаратие, Пари ГIумаровалъе. Гьезда ва цогидазда заман батула, сундухъго балагьичIого, гIун бачIунеб гIелалда гьоркьоб ислам тIибитIизабизеги, исламияб газета машгьур гьабизеги.
Чакар ХIусенова, муфтияталъул ГIахьвахъ районалда бугеб отделалъул нухмалъулей
